بتتغير كتير الاشيا مع الوقت، وشي طبيعي انه تتغير.. بتتغير الاسعار، الجو، الصحبة وطعمة الاشيا, العالم بيتغيروا حتى الاصحاب بيجي وقت ويمكن يتغيروا.. في اشيا بتبهت مع الوقت وفي اشيا بيقوى وهجا، الاهتمام بيقل وبيزيد، حسب الفتله. وفي اشيا بتتغير بطريقه حلوه، متل ما بيتغير لون الشمس بس تمرق علي تختك، متل ما العطر بتصير ريحتو احلى بس يكون على رقبتك. متل ما انا بكون حدا غير بس كون معك.. والقهوة طعمتا اطيب من فنجانك. حتى الغزل بتتغير طريقته مع الوقت، مش ملاحظة مثلاً انو عم بكتب بالدارج على غير عادة؟ ويمكن اعمل بلوغ جديد سميّه: وقفت هون وخرطشت.. كل شي جايز، معك انتي كل شي بيصير.
كتير غريبه صايرة الاشيا بيناتنا اخر فترة، تغيرتي كتير وانا تغيرت كمان.. فاتت اشيا وناس بيناتنا وتعقدت الامور مع انه اللي كان حلو بيناتنا البساطة والطريقة الي بنتعامل فيها مع الاشيا، كتير بحب هالشي بيناتنا، ليه صارت كتير صعبة انه نبسّط الاشيا؟ وليه صايرة تتعقد الاشيا بسهوله؟
ما بعرف ليه عم بكتب هيك ولوين بدي اوصل.. اصلاً انا كنت ناوي اكتب شي صغير من هودي الخواطر اللي بكتبن كل فترة.. بس طلع معي هيك.. على فكرة انا عم فكر بصوت عالي ومكتوب.. هلأ بتصور انك اخدتي فكرة كيف بفكر وشو بقول بس احكي مع حالي.
قد ما تغيرت الاشياء من حوالينا وقد ما انتي تغيرتي وانا تغيرت.. انتي مش رح تتغيري جواتي، رح تضلك انتي انتي، ورح ضل شوفك متل ما شفتك اول مرة وضحكتيلي.. بتتذكري؟
